Co pikia pakai utak ketek

Antahlah.. Muluik kalian manih.. Gaya kalian salangik.. Foto dipajang jo muko janiah.. Janji ditulis cando urang ndak badoso.. Padohal hati kalian busuak.. Utak kalian panuah jo duto.. Jikok tapiliah ka bakarajo untuak rakyat.. Mengabdikan diri untuak masayarakat..

Maaf Yuang.. Sorry Piak.. Kami awam tapi ndak bodoh.. Kami mangarati kalau kemampuan kalian ndak ado.. Nan ado hanyo nafsu dunia.. Kalian hanyo taragak sanang.. Makan gaji buto walau ndak pernah maraso kanyang.. Jalan-jalan jo paruik gadang.. Mintak jatah proyek malam, pagi, siang jo patang.. Woi kalian nan jadi Caleg jo calon pemimpin.. Nan tiok sabanta kampanye pencitraan.. Mampromosikan diri kalau kalian santiang surang..

Tolong kalian dangakan pitaruah kami ko.. Sabarih jan dihilangkan, satitiak jan dilupokan.. Jadi pidoman siang jo malam.. Suluah dinan kalam, Palito iduik dinan karuah, Tungkek dinan rabah..

Pemimpin itu dipiliah bukan mamintak-mintak untuak dipiliah.. Bukan mangemis-ngemis supayo diangkek.. Kami paralu pemimpin bukan panguaso.. Pemilu adolah pesta demokrasi bukan tampek untuak barabuik kuaso.. Bukan ajang untuak baleh dandam jo manumpuak harato..

Kami muak kami bosan jo nagari galadia ko.. Nagari nan panuah jo rekayasa.. Sejarah nan diputa baliakan dek nan bakuaso.. Taragak rasonyo kami pindah jo maninggakan nagari kacau balau ko.. Tapi iko tanah tampek lahia kami.. Raso cinto jo nasionalisme kami mangalahkan banci kami kapado kalian wahai Mancik-mancik Senayan..

Kalau emang rasonyo niat tu buruak.. Mancari pitih jo jalan pinteh.. Rancak bapikia ulang.. Jan sampai sasa tibo dikamudian hari.. Anak bini manangguang akibatnyo.. Badan diri maringkuak dalam pinjaro.. Didunia taseso, diakhiraik binaso..